तुम्ही ऑनलाईन शॉपिंग करता का ? मग ही बातमी खास तुमच्यासाठी आहे. कारण आता केंद्र सरकार लवकरच ‘खादी इंडिया’चं अत्याधुनिक ई-कॉमर्स पोर्टल लॉन्च करणार आहे. खादी आणि ग्रामोद्योग आयोगाचे अध्यक्ष मनोज कुमार यांनी ही घोषणा केली आहे. या नव्या पोर्टलचं सर्वात मोठं वैशिष्ट्य म्हणजे ते पूर्णपणे मोबाईल-फर्स्ट तंत्रज्ञानावर आधारित असणार आहे. ग्राहकांना उत्पादनांचे हाय-रिझोल्यूशन फोटो पाहता येतील, जलद आणि सुरक्षित ऑनलाईन पेमेंट करता येईल, तसेच ‘Shop The Look’ सारखे आंतरराष्ट्रीय दर्जाचे आधुनिक फीचर्सही उपलब्ध असतील.
सरकारचा उद्देश स्पष्ट आहे की आजच्या Gen Z पिढीला खादीकडे आकर्षित करणे आणि भारतीय खादी ब्रँडला जागतिक स्तरावर अधिक मजबूत ओळख मिळवून देणे. खादी क्षेत्राच्या वाढीचे आकडेही तितकेच आश्चर्यकारक आहेत. आर्थिक वर्ष 2013-14 मध्ये खादी उत्पादनांची विक्री सुमारे 31 हजार कोटी रुपये होती. ती वाढून 2025-26 मध्ये तब्बल 1.87 लाख कोटी रुपयांवर पोहोचली आहे. यंदाच्या वर्षात ही विक्री 2.5 लाख कोटी रुपयांचा टप्पा पार करू शकते, असा अंदाज व्यक्त केला जात आहे. फक्त विक्रीच नाही, तर रोजगाराच्या संधींमध्येही मोठी वाढ झाली आहे. 2013-14 मध्ये खादी क्षेत्राशी जोडलेला रोजगार 1.30 कोटी होता, जो आता 2.04 कोटींवर पोहोचला आहे. म्हणजेच कोट्यवधी हातांना रोजगार मिळवून देण्यात खादी क्षेत्र महत्त्वाची भूमिका बजावत आहे.
एकूणच, नवीन ‘खादी इंडिया’ पोर्टल हे केवळ शॉपिंग प्लॅटफॉर्म नसून भारतीय परंपरा, रोजगार आणि डिजिटल भारत यांना जोडणारे महत्त्वाचे पाऊल ठरणार आहे.
