NEET-UG 2026 पुनर्परीक्षेच्या पार्श्वभूमीवर केंद्र सरकारने मेसेजिंग प्लॅटफॉर्म टेलिग्रामवर 22 जूनपर्यंत तात्पुरते निर्बंध लागू केले आहेत. याशिवाय टेलिग्रामचे ‘मेसेज एडिट’ फीचर 30 जूनपर्यंत बंद ठेवण्याचे निर्देश देण्यात आले आहेत. हा निर्णय नॅशनल टेस्टिंग एजन्सी (NTA) च्या शिफारशीनंतर घेण्यात आल्याची माहिती समोर आली आहे. NTA च्या मते, काही फसवणूक करणारे गट टेलिग्रामचा वापर करून NEET प्रश्नपत्रिका लीक झाल्याचे खोटे दावे करत होते. विशेषतः मेसेज एडिट फीचरचा गैरवापर करून जुने मेसेज बदलण्यात येत होते आणि त्यामध्ये परीक्षा झाल्यानंतर प्रश्नपत्रिका किंवा PDF जोडून पेपर आधीच उपलब्ध होता, असा आभास निर्माण केला जात होता.
21 जून रोजी होणाऱ्या NEET-UG पुनर्परीक्षेची निष्पक्षता आणि सुरक्षितता कायम ठेवण्यासाठी हे पाऊल उचलण्यात आल्याचे NTA ने स्पष्ट केले आहे. एजन्सीच्या म्हणण्यानुसार, “PAPER LEAKED NEET”, “Re-NEET 2026” आणि इतर काही टेलिग्राम चॅनेल्स विद्यार्थ्यांकडून पैसे घेऊन कथित प्रश्नपत्रिका उपलब्ध करून देण्याचा दावा करत होते. NTA ने सांगितले की, यापूर्वी संबंधित चॅनेल्स आणि गटांवर कारवाई करण्यात आली होती. मात्र, त्यानंतरही चुकीची माहिती आणि फसवणुकीचे प्रकार सुरूच राहिल्याने व्यापक स्तरावर निर्बंध घालण्याचा निर्णय घेण्यात आला.
दरम्यान, या निर्णयामुळे लाखो सामान्य टेलिग्राम वापरकर्त्यांनाही काही काळ अडचणींचा सामना करावा लागू शकतो. मात्र, परीक्षा प्रक्रियेची विश्वासार्हता आणि पारदर्शकता जपण्यासाठी हा तात्पुरता उपाय आवश्यक असल्याचे सरकार आणि NTA चे म्हणणे आहे. NEET-UG पुनर्परीक्षा 21 जून रोजी होणार असून विद्यार्थ्यांनी कोणत्याही अफवा किंवा कथित पेपर लीकच्या दाव्यांवर विश्वास न ठेवता केवळ अधिकृत माहितीलाच प्राधान्य द्यावे, असे आवाहन NTA ने केले आहे.
