भारत-अमेरिका व्यापार करारावर ट्रम्प यांचा विश्वास; ‘मोदी माझे चांगले मित्र, पण भारताने वर्षानुवर्षे अमेरिकेवर जास्त टॅरिफ लादले’
अमेरिकेचे राष्ट्राध्यक्ष डोनाल्ड ट्रम्प यांनी भारताबाबत एकीकडे कौतुक तर दुसरीकडे गंभीर आरोप करत भारत-अमेरिका संबंध पुन्हा चर्चेत आणले आहेत. पंतप्रधान नरेंद्र मोदी हे आपले “चांगले मित्र” असल्याचे सांगतानाच, भारताने अनेक वर्षे अमेरिकेचा फायदा घेतल्याचा आरोप ट्रम्प यांनी केला. व्हाईट हाऊसमध्ये पत्रकारांशी संवाद साधताना ट्रम्प म्हणाले की, भारत आणि अमेरिका लवकरच एका मोठ्या व्यापार करारावर स्वाक्षरी करू शकतात. मात्र, यापूर्वी भारताने अमेरिकन वस्तूंवर मोठ्या प्रमाणात आयात शुल्क (टॅरिफ) लावल्यामुळे अमेरिकेला अपेक्षित लाभ मिळत नव्हता, असा दावा त्यांनी केला.
“भारताने अनेक वर्षे अमेरिकेचा फायदा घेतला. त्यांनी आमच्या उत्पादनांवर मोठे टॅरिफ लादले आणि बदल्यात फारसं काही दिलं नाही. मात्र आता परिस्थिती बदलली आहे आणि अमेरिका भारताकडून मोठ्या प्रमाणात महसूल मिळवत आहे,” असे ट्रम्प म्हणाले. विशेष म्हणजे, भारतावर टीका करतानाच ट्रम्प यांनी अमेरिकेच्या पूर्वीच्या सरकारांनाही जबाबदार धरले. भारताने स्वतःच्या हिताचे निर्णय घेतले, पण अमेरिकेच्या आधीच्या नेतृत्वाने त्याकडे दुर्लक्ष केल्याचे त्यांनी नमूद केले.
दरम्यान, अमेरिकेने भारतासह चीन, जपान, इस्रायल, पाकिस्तान, कॅनडा आणि युरोपियन युनियनमधील देशांच्या उत्पादनांवर अतिरिक्त टॅरिफ लावण्याचा प्रस्तावही मांडला आहे. त्यामुळे आगामी काळात भारत-अमेरिका व्यापार संबंध आणि प्रस्तावित व्यापार कराराकडे जागतिक स्तरावर लक्ष लागले आहे.
