अन्न व औषध प्रशासन (FDA) आयुक्तपदाचा कार्यभार स्वीकारताच सनदी अधिकारी तुकाराम मुंढे पुन्हा एकदा ‘अॅक्शन मोड’मध्ये दिसून आले आहेत. आपल्या कडक आणि शिस्तप्रिय कामकाजासाठी ओळखले जाणारे मुंढे यांनी 25 मे रोजी FDA आयुक्त म्हणून पदभार स्वीकारला आणि अवघ्या तीन दिवसांत राज्यभर विशेष धडक मोहीम राबवत मोठी कारवाई केली. राज्यातील नागरिकांच्या आरोग्याशी खेळ करणाऱ्या अनधिकृत आणि बेकायदेशीर आस्थापनांविरोधात ही मोहीम सुरू करण्यात आली. मुंढे यांनी पदभार स्वीकारल्यानंतर सर्व विभागीय अधिकाऱ्यांना तातडीने धाडी आणि जप्तीची कारवाई करण्याचे निर्देश दिले होते. त्यानंतर मुंबई, कोकण, पुणे, नाशिक, अमरावती, नागपूर आणि छत्रपती संभाजीनगर विभागात एकाच वेळी मोठ्या प्रमाणावर कारवाई करण्यात आली.
अन्न सुरक्षा अधिकाऱ्यांनी तीन दिवसांत राज्यभरातील 53 आस्थापनांवर छापे टाकले. यापैकी 34 ठिकाणी प्रतिबंधित गुटखा, पानमसाला आणि तत्सम पदार्थांची विक्री सुरू असल्याचे आढळले. या प्रकरणी 25 एफआयआर दाखल करण्यात आले असून 33 जणांना अटक करण्यात आली आहे. तसेच गुटखा वाहतूक करणारी 5 वाहने जप्त करण्यात आली असून 27 आस्थापनांना सील ठोकण्यात आले आहे.
या मोहिमेत मुंबई विभागात सर्वात मोठी कारवाई झाली. बृहन्मुंबईत 19 आस्थापनांची झाडाझडती घेऊन सर्व आस्थापनांवर सीलची कारवाई करण्यात आली. तसेच 19 जणांविरोधात गुन्हे दाखल करून अटक करण्यात आली. या कारवाईत एकूण 20 लाख 57 हजार 296 रुपयांचा बेकायदेशीर मुद्देमाल जप्त करण्यात आला. याशिवाय पॅकबंद पिण्याचे पाणी, दूध, नूडल्स, खाद्यतेल, मसाले, खवा, पनीर, तूप, बेसन, आईसक्रीम आणि बेकरी पदार्थांसह 23 आस्थापनांची तपासणी करण्यात आली. यामध्ये 28 लाख 78 हजार 572 रुपयांचे संशयास्पद आणि नियमबाह्य खाद्यपदार्थ जप्त करण्यात आले. जप्त केलेल्या नमुन्यांची प्रयोगशाळा तपासणी सुरू असून पुढील कारवाईचा निर्णय अहवालानंतर घेतला जाणार आहे. तुकाराम मुंढे यांच्या नियुक्तीनंतर FDAची ही पहिली मोठी कारवाई मानली जात असून राज्यभरातील भेसळखोर आणि नियम मोडणाऱ्या आस्थापनांना यामुळे स्पष्ट इशारा मिळाल्याचं बोललं जात आहे.
