आपल्या कडक शिस्तीच्या आणि धडाकेबाज कारवाईच्या शैलीमुळे चर्चेत असलेले IAS अधिकारी तुकाराम मुंढे पुन्हा एकदा चर्चेचा विषय ठरले आहेत. यावेळी त्यांच्या प्रशासकीय कारवाईमुळे नव्हे, तर त्यांच्या जीवनावर आधारित चित्रपटाच्या चर्चेमुळे त्यांचं नाव समोर आलं आहे. तुकाराम मुंढे यांच्या जीवनावर बायोपिक तयार होणार असल्याची चर्चा सोशल मीडियावर रंगली आहे. मात्र, या चित्रपटाबाबत अद्याप कोणतीही अधिकृत घोषणा झालेली नाही.
तुकाराम मुंढेंची भूमिका कोण साकारणार?
बायोपिकची चर्चा सुरू झाल्यानंतर सर्वाधिक उत्सुकता निर्माण झाली आहे ती तुकाराम मुंढेंची भूमिका कोणता अभिनेता साकारणार, याबाबत. सोशल मीडियावर या भूमिकेसाठी दोन नावांची जोरदार चर्चा सुरू आहे. यामध्ये के. के. मेनन आणि अक्षय कुमार या दोन अभिनेत्यांची नावे पुढे आली आहेत. दोन्ही कलाकारांनी यापूर्वीही गंभीर आणि आव्हानात्मक भूमिका साकारल्या आहेत. त्यामुळे मुंढेंच्या व्यक्तिरेखेसाठी कोणाची निवड योग्य ठरेल, यावर चाहत्यांमध्ये चर्चा रंगली आहे.
के. के. मेनन यांना चाहत्यांची पसंती
सोशल मीडियावरील चर्चेत मात्र के. के. मेनन यांचं पारडं जड असल्याचं दिसत आहे. तुकाराम मुंढेंची कडक शिस्त, स्पष्टवक्तेपणा आणि नियमांबाबत कोणतीही तडजोड न करण्याची वृत्ती पडद्यावर प्रभावीपणे साकारण्यासाठी के. के. मेनन योग्य ठरतील, असं अनेक वापरकर्त्यांचं म्हणणं आहे. काही सोशल मीडिया वापरकर्त्यांनी तर ही भूमिका के. के. मेनन यांच्यासाठीच योग्य असल्याच्या प्रतिक्रिया दिल्या आहेत. दुसरीकडे, अक्षय कुमार यांचं नावही चर्चेत असल्याने या भूमिकेसाठी दोन्ही अभिनेत्यांच्या नावांमध्ये तुलना सुरू झाली आहे.
तुकाराम मुंढे का आहेत चर्चेत?
तुकाराम मुंढे हे आपल्या प्रशासकीय कारकिर्दीत कठोर निर्णय आणि शिस्तप्रिय कार्यपद्धतीसाठी ओळखले जातात. विविध पदांवर काम करताना त्यांनी नियमांची काटेकोर अंमलबजावणी करण्यावर भर दिला. त्यांच्या कार्यपद्धतीमुळे ते अनेकदा चर्चेत आले असून, सोशल मीडियावर त्यांच्या कामाची प्रशंसा करणाऱ्या पोस्टही मोठ्या प्रमाणात पाहायला मिळतात. सध्या ते महाराष्ट्राच्या अन्न व औषध प्रशासनाचे आयुक्त म्हणून कार्यरत आहेत. त्यांच्या धडक कारवायांमुळे ते पुन्हा चर्चेत आले आहेत.
बायोपिकची अधिकृत घोषणा कधी?
तुकाराम मुंढेंच्या जीवनावर चित्रपट बनणार असल्याची चर्चा सोशल मीडियावर सुरू असली, तरी चित्रपटाची निर्मिती, कलाकारांची निवड किंवा प्रदर्शनाबाबत अद्याप अधिकृत घोषणा झालेली नाही.त्यामुळे के. के. मेनन किंवा अक्षय कुमार यापैकी कोणताही अभिनेता मुंढेंची भूमिका साकारणार असल्याचे सध्या निश्चितपणे सांगता येत नाही.मात्र, जर हा बायोपिक प्रत्यक्षात आला, तर तुकाराम मुंढेंच्या प्रशासकीय कारकिर्दीतील संघर्ष, बदल्या, धडक कारवाया आणि त्यांच्या कार्यशैलीचा प्रवास मोठ्या पडद्यावर पाहण्याची उत्सुकता नक्कीच वाढणार आहे.
