टायगर श्रॉफवरील गोळीबाराच्या घटनेनंतर महाराष्ट्रातील कायदा-सुव्यवस्थेच्या मुद्द्यावरून राजकीय आरोप-प्रत्यारोप सुरू झाले आहेत. याच पार्श्वभूमीवर भाजप नेते नितेश राणे यांनी माध्यमांशी बोलताना उद्धव ठाकरे यांच्यावर टीका केली. दिशा सालियन आणि सुशांत सिंह राजपूत यांच्या मृत्यूच्या प्रकरणांचा उल्लेख करत त्यांनी ठाकरे यांच्या मुख्यमंत्रीपदाच्या कार्यकाळातील तपासावर प्रश्न उपस्थित केले.
“दिशा सालियन FIR मध्ये नाव आलेल्यांनी कायदा-सुव्यवस्थेवर बोलणं म्हणजे हास्यास्पदच आहे. आम्ही टायगर श्रॉफवरील हल्ल्याच्या आरोपींना २४ तासांत पकडलं; पण तुमच्या काळात दिशा सालियन आणि सुशांत सिंह राजपूत प्रकरणातील पुरावे नष्ट केल्याचे आरोप झाले. आधी या प्रश्नांची उत्तरं द्या, मग कायदा-सुव्यवस्थेवर बोला,” असं नितेश राणे म्हणाले. टायगर श्रॉफवरील हल्ल्याच्या तपासाचा दाखला देत राणे यांनी मुख्यमंत्री आणि गृहमंत्री देवेंद्र फडणवीस यांच्या नेतृत्वाखालील सरकारच्या पोलिस कारवाईचं समर्थन केलं. या प्रकरणात पोलिसांनी इतर राज्यांशी समन्वय साधून २४ तासांच्या आत आरोपींना अटक केल्याचा दावा त्यांनी केला. गुन्हेगारांविरोधात तातडीने कारवाई केली जात असल्याचंही त्यांनी सांगितलं.
यावेळी राणे यांनी सुशांत सिंह राजपूत आणि दिशा सालियन यांच्या मृत्यूच्या प्रकरणांचाही संदर्भ दिला. उद्धव ठाकरे मुख्यमंत्री असताना या प्रकरणांच्या तपासावर प्रश्न उपस्थित झाले होते, असं म्हणत त्यांनी तत्कालीन सरकारवर टीका केली. तसेच, या प्रकरणांमध्ये पुरावे नष्ट केल्याचे आरोप झाल्याचा उल्लेख करत त्यांनी ठाकरेंना या मुद्द्यांवर उत्तर देण्याचं आव्हान दिलं. पोलिसांच्या कामकाजावर बोलताना राणे यांनी, सध्याच्या सरकारच्या काळात कोणत्याही नागरिकावर किंवा बॉलिवूड कलाकारावर हल्ला झाल्यास पोलिसांकडून तातडीने कारवाई केली जात असल्याचं म्हटलं. याउलट, मागील सरकारच्या काळात पोलिस यंत्रणेच्या कामकाजावर प्रश्न उपस्थित करत त्यांनी राजकीय टीका केली.
