भारतामध्ये UPSC ही परीक्षा देशातील सर्वात कठीण स्पर्धा परीक्षांपैकी एक मानली जाते. दरवर्षी लाखो विद्यार्थी ही परीक्षा देतात, पण त्यापैकी फार थोड्यांनाच यश मिळतं. अशा कठीण परीक्षेत अनेक जण वर्षानुवर्षे प्रयत्न करूनही यश मिळवू शकत नाहीत. मात्र काही लोक आपल्या जिद्दीने आणि मेहनतीने अशक्य वाटणारी गोष्टही शक्य करून दाखवतात. अशीच एक प्रेरणादायी कथा आहे शरण कांबळे यांची.
सोलापूर जिल्ह्यातील ताडवले या छोट्याशा गावात शरण कांबळे यांचा जन्म झाला. घरची परिस्थिती अत्यंत साधी होती. वडील मजुरी करून घर चालवत होते, तर आई भाज्या विकून कुटुंबाला हातभार लावत होती. रोजचा दिवस कसा निभावून जाईल हेच कुटुंबासमोर मोठं आव्हान असायचं. पण या सगळ्या अडचणींमध्येही त्यांच्या पालकांनी एक गोष्ट कायम ठेवली – मुलांना शिक्षण द्यायचंच.
शरण कांबळे यांचं सुरुवातीचं शिक्षण गावातील सरकारी शाळेत झालं. दहावीपर्यंत शिक्षण गावातच झालं, पण त्यानंतर परिस्थिती आणखी कठीण झाली. पुढील शिक्षणासाठी त्यांना दररोज जवळपास १२ किलोमीटर चालत शाळेत जावं लागायचं. त्या काळात त्यांच्या गावात वीजसुद्धा नव्हती. तरीही त्यांनी अभ्यास थांबवला नाही. अंधारात दिव्याच्या किंवा इतर साध्या प्रकाशात अभ्यास करत त्यांनी शिक्षण सुरू ठेवले.
पुढे त्यांनी वालचंद कॉलेज ऑफ इंजिनियरिंगमधून बी.टेक पूर्ण केलं. त्यानंतर त्यांनी IISC (Indian Institute of Science) मधून पोस्ट ग्रॅज्युएशन केलं. या काळात त्यांना महाराष्ट्र स्कॉलरशिप मिळाली, ज्यामुळे त्यांचा शिक्षणाचा प्रवास पुढे सुरू ठेवणं शक्य झालं.
इंजिनियरिंग पूर्ण झाल्यानंतर शरण कांबळे यांना एका मोठ्या कंपनीमध्ये २० लाख रुपयांचा पगार असलेली नोकरी मिळाली. अनेकांसाठी हेच आयुष्यातील अंतिम स्वप्न असतं. चांगली नोकरी, मोठा पगार आणि सुरक्षित भविष्य. पण शरण कांबळे यांचं स्वप्न काही वेगळंच होतं.
त्यांना देशासाठी आणि समाजासाठी काम करायचं होतं. म्हणून त्यांनी सिव्हिल सर्व्हिसमध्ये जाण्याचा निर्णय घेतला. आणि त्यासाठी त्यांनी २० लाखांची नोकरी सोडण्याचा धाडसी निर्णय घेतला.
हा निर्णय नक्कीच सोपा नव्हता. कारण आर्थिकदृष्ट्या स्थिर आयुष्य सोडून पुन्हा स्पर्धा परीक्षेच्या अनिश्चिततेमध्ये उडी घेणं म्हणजे मोठा धोका होता. पण शरण कांबळे यांना आपल्या ध्येयावर पूर्ण विश्वास होता.
त्यांनी UPSC परीक्षेची तयारी सुरू केली. अनेक तास अभ्यास, सातत्यपूर्ण मेहनत आणि अपयशाची भीती न बाळगता त्यांनी प्रयत्न सुरू ठेवले. त्यांच्या या प्रयत्नांना यश मिळालं आणि त्यांनी फक्त एकदाच नाही, तर सलग तीन वेळा UPSC परीक्षा पास करून दाखवली.
ही गोष्ट खरोखरच विलक्षण आहे. कारण UPSC एकदाच पास करणं देखील खूप कठीण मानलं जातं. शेवटी शरण कांबळे यांनी IPS अधिकारी होण्याचा पर्याय निवडला आणि देशसेवेसाठी आपला प्रवास सुरू केला.
शरण कांबळे यांची कथा आपल्याला एक महत्त्वाचा धडा देते कि सुरुवात किती कठीण होती यापेक्षा आपण शेवटी कुठे पोहोचतो हे अधिक महत्त्वाचं असतं. वीज नसलेलं गाव, आर्थिक अडचणी, रोजचा संघर्ष… या सगळ्यांवर मात करून त्यांनी स्वतःचं भविष्य घडवलं.
आज शरण कांबळे यांची कथा हजारो तरुणांसाठी प्रेरणादायी ठरत आहे. कारण ती आपल्याला सांगते की परिस्थिती कितीही कठीण असली तरी जिद्द आणि मेहनत असेल तर यश मिळवणं अशक्य नाही.
