महाराष्ट्र विधानपरिषदेच्या शिक्षक आणि पदवीधर मतदारसंघांच्या निवडणुकीची मतमोजणी सुरू असतानाच पुण्यातील मतमोजणी केंद्रावर अनेक मुद्द्यांवरून वाद निर्माण झाला. काही मतपेट्यांच्या सीलवर आक्षेप, उमेदवारांच्या प्रतिनिधींची नाराजी आणि मतपेटीत सापडलेली एका शिक्षकाची चिठ्ठी यामुळे पुण्यातील मतमोजणी चर्चेत आली आहे.
मतपेटीत चिठ्ठी; शिक्षकाचा जुन्या पेन्शनसाठी इशारा
पुणे शिक्षक मतदारसंघाच्या मतमोजणीदरम्यान पुरंदर तालुक्यातील राजेवाडी मतदान केंद्राच्या मतपेटीत एक चिठ्ठी आढळली. या चिठ्ठीतून संबंधित शिक्षकाने जुन्या पेन्शन योजनेचा मुद्दा उपस्थित करत आपला रोष व्यक्त केल्याची माहिती उमेदवारांच्या प्रतिनिधींनी दिली. तमोजणीच्या दुसऱ्या फेरीत टेबल क्रमांक दोनवर राजेवाडी मतदान केंद्रातील मतपत्रिका मोजण्यासाठी बाहेर काढल्या जात असताना हा कागद दिसून आला. त्यानंतर उमेदवारांच्या प्रतिनिधींनी निवडणूक अधिकाऱ्यांना आधी मतपत्रिकांचे गठ्ठे जुळवण्याची आणि त्यानंतर चिठ्ठी वाचून दाखवण्याची विनंती केली. या चिठ्ठीत शिक्षकाने, आपल्याला कोणीही विकत घेऊ शकत नाही आणि 2004 पूर्वीची जुनी पेन्शन योजना लागू करावी, अन्यथा परिणामांना सामोरे जावे लागेल, अशा आशयाचा संदेश लिहिल्याचे प्रतिनिधींनी सांगितले. ही चिठ्ठी निवडणूक निर्णय अधिकाऱ्यांकडे सुपूर्द करण्याची मागणीही करण्यात आली. या घटनेमुळे शिक्षकांच्या प्रलंबित प्रश्नांचा आणि जुन्या पेन्शन योजनेच्या मागणीचा मुद्दा पुन्हा चर्चेत आला आहे. मात्र, या चिठ्ठीमागे नेमका कोणता मतदार आहे किंवा तिचा निवडणुकीच्या निकालावर काही परिणाम होणार का, याबाबत स्पष्ट माहिती समोर आलेली नाही.
मतपेट्यांच्या सीलवर आक्षेप; मतमोजणी केंद्रावर तणाव
पुण्यातील बालेवाडी स्टेडियम येथे शिक्षक आणि पदवीधर मतदारसंघांची मतमोजणी सुरू असताना काही मतपेट्यांच्या सीलबाबतही प्रश्न उपस्थित करण्यात आले. पुणे पदवीधर मतदारसंघातील महाविकास आघाडीच्या उमेदवार हर्षदा देशमुख जाधव यांच्या प्रतिनिधींनी काही मतपेट्यांच्या सील केलेल्या तारा तुटल्याचे आणि लाखेचे सील नसल्याचे निदर्शनास आणून दिले. या प्रकारावर आक्षेप घेत संबंधित मतपेट्या बाजूला ठेवून सील व्यवस्थित असलेल्या मतपेट्यांची आधी मोजणी करावी, अशी मागणी करण्यात आली. निवडणूक आयोगाकडून संबंधित बाबींचे व्हिडिओ दाखवले जातील, असे स्पष्ट करण्यात आल्याची माहिती आहे. मतपेट्यांच्या सीलबाबत उपस्थित करण्यात आलेल्या आक्षेपांमुळे मतमोजणी केंद्रावर काही काळ तणावाचे वातावरण निर्माण झाले. या आक्षेपांवर निवडणूक यंत्रणा काय स्पष्टीकरण देते आणि त्यानंतर मतमोजणीची प्रक्रिया कशी पुढे जाते, याकडे लक्ष लागले आहे.
जयंत आसगावकर यांच्याकडूनही आक्षेप
पुणे शिक्षक मतदारसंघातील महाविकास आघाडीचे उमेदवार जयंत दिनकर आसगावकर यांनीही मतमोजणीच्या प्रक्रियेतील विविध मुद्द्यांवर आक्षेप घेतल्याची माहिती समोर आली आहे. इतर उमेदवारांच्या प्रतिनिधींनीही प्रक्रियेबाबत नाराजी व्यक्त केली. मतमोजणी सुरू झाल्यापासून वेगवेगळ्या मुद्द्यांवर हरकती घेतल्या जात असल्याने निकालाच्या प्रक्रियेकडे राजकीय वर्तुळाचे लक्ष लागले आहे.
पेन, कागद आणि वैयक्तिक वस्तू नेण्यावरूनही वाद
मतमोजणी केंद्रात प्रवेश करताना पोलिसांनी पेन आणि कागद नेण्यास मज्जाव केल्याने काही प्रतिनिधींनी नाराजी व्यक्त केली. याशिवाय घड्याळ आणि वाहनाची चावी आत नेण्याच्या मुद्द्यावरूनही प्रतिनिधी आणि पोलिसांमध्ये वाद झाल्याची माहिती आहे. एकीकडे मतमोजणीची प्रक्रिया सुरू असताना दुसरीकडे मतपेट्यांच्या सीलबाबतचे आक्षेप, प्रवेशावरील निर्बंध आणि जुन्या पेन्शनसाठी शिक्षकाने लिहिलेली चिठ्ठी या घटनांमुळे पुणे शिक्षक-पदवीधर मतदारसंघाची मतमोजणी चर्चेचा विषय ठरली आहे. या निवडणुकीत शिक्षक आणि पदवीधर मतदारांचा कौल कोणाच्या बाजूने लागतो, तसेच मतमोजणीदरम्यान उपस्थित झालेल्या आक्षेपांवर निवडणूक यंत्रणा काय भूमिका घेते, हे पाहणे महत्त्वाचे ठरणार आहे.
