“‘काळ आला होता, पण वेळ आली नव्हती” या म्हणीचा प्रत्यय देणारी घटना रायगड जिल्ह्यातील खालापूर तालुक्यात घडली. मिसिंग लिंक परिसरात पर्यटनासाठी आलेल्या एका 59 वर्षीय पर्यटकाची कार तब्बल 50 फूट खोल दरीत कोसळली. मात्र, कार मधल्या झाडाला अडकल्याने मोठी दुर्घटना टळली आणि पर्यटकाचा जीव वाचला.
मिळालेल्या माहितीनुसार, मोहित भटनागर (वय 59) हे पर्यटनासाठी खालापूर परिसरात आले होते. दुपारी सुमारे 12 वाजण्याच्या सुमारास ते मिसिंग लिंक परिसरातील टेकडीवर कॅम्पिंगसाठी योग्य ठिकाण शोधत होते. यावेळी मिसिंग लिंक वरून पाहण्यासाठी त्यांनी टेकडीवरील कच्च्या रस्त्याने कार पुढे नेली. मात्र, कच्च्या रस्त्याचा अंदाज न आल्याने त्यांची कार भरकटली आणि थेट दरीत कोसळली. सुदैवाने, सुमारे 50 फूट खाली असलेल्या झाडांमध्ये कार अडकल्याने ती आणखी खोल दरीत कोसळण्यापासून वाचली. नाहीतर कार थेट मिसिंग लिंक मार्गावर कोसळण्याची शक्यता असल्याचे सांगण्यात येत आहे.
घटनेची माहिती मिळताच बोरघाट महामार्ग पोलिसांचे पथक तातडीने घटनास्थळी दाखल झाले. स्थानिक नागरिकांच्या मदतीने पोलिसांनी दरीत उतरून कारमध्ये अडकलेल्या जखमी पर्यटकाची सुटका केली. जवळपास अर्धा तास सुरू असलेल्या या बचाव कार्यानंतर त्यांना सुरक्षित बाहेर काढण्यात आले.
या अपघातात मोहित भटनागर जखमी झाले असून त्यांच्यावर उपचार सुरू आहेत. दरम्यान, प्राथमिक माहितीनुसार, या प्रकरणाचा पुढील तपास खोपोली पोलीस करत आहेत.
