
माढा विधानसभा मतदारसंघाचे राष्ट्रवादी काँग्रेस शरदचंद्र पवार पक्षाचे आमदार अभिजीत पाटील यांना शिवसेनेत येण्याची थेट ऑफर देण्यात आली आहे. विशेष म्हणजे, शिवसेनेत प्रवेश केल्यास मंत्रीपदही देऊ, असं आश्वासन मंत्री भरत गोगावले यांनी दिलं आहे. कार्तिकी एकादशीनिमित्त पंढरपुरात आले असताना गोगावले यांनी हे वक्तव्य केलं. त्यामुळे अभिजीत पाटील यांच्या पक्षांतराच्या चर्चेला सुरुवात झाली आहे. आता गोगावले यांच्या या ऑफरला अभिजीत पाटील काय उत्तर देणार, याकडे राजकीय वर्तुळाचं लक्ष लागलं आहे.
अभिजीत पाटील हे सोलापूर जिल्ह्यातील माढा विधानसभा मतदारसंघाचे आमदार आहेत. ते राष्ट्रवादी काँग्रेस शरदचंद्र पवार पक्षाकडून निवडून आले आहेत. राजकारणात येण्यापूर्वीच त्यांनी सहकार क्षेत्रात आपली ओळख निर्माण केली होती. जुलै 2022 मध्ये त्यांच्या श्री विठ्ठल परिवर्तन विकास आघाडीने पंढरपूरमधील विठ्ठल सहकारी साखर कारखान्याच्या निवडणुकीत विजय मिळवला. त्यानंतर ते या कारखान्याचे चेअरमन झाले. साखर कारखान्याच्या माध्यमातून त्यांनी पंढरपूर आणि परिसरातील राजकारणात आपला प्रभाव निर्माण केला.
2023 मध्ये त्यांनी शरद पवार यांच्या राष्ट्रवादी काँग्रेसमध्ये प्रवेश केला. त्यानंतर 2024 च्या विधानसभा निवडणुकीत त्यांना माढा विधानसभा मतदारसंघातून उमेदवारी देण्यात आली. या निवडणुकीत अभिजीत पाटील यांनी 1 लाख 36 हजार 559 मतं मिळवत विजय मिळवला. त्यांनी अपक्ष उमेदवार रणजितसिंह शिंदे यांचा 30 हजार 621 मतांनी पराभव केला. या विजयामुळे माढा मतदारसंघात अनेक वर्षांपासून असलेली बबनराव शिंदे यांची राजकीय पकड संपुष्टात आली. दरम्यान, कार्तिकी एकादशीनिमित्त पंढरपुरात मोठ्या प्रमाणात वारकरी दाखल झाले होते. याच निमित्ताने राज्याचे उपमुख्यमंत्री एकनाथ शिंदे यांच्या हस्ते श्री विठ्ठल-रुक्मिणीची शासकीय महापूजा पार पडली. या सोहळ्यासाठी शिवसेना शिंदे गटाचे मंत्री आणि आमदारही पंढरपुरात उपस्थित होते. मंत्री भरत गोगावले हेदेखील यावेळी पंढरपुरात आले होते. याच कार्यक्रमादरम्यान त्यांनी अभिजीत पाटील यांच्याबाबत हे वक्तव्य केलं.

गोगावले म्हणाले की, जेव्हा आपण संकटात असतो, तेव्हा देव आपल्या मदतीला उभा राहतो. मात्र, ज्यावेळी देवच अडचणीत आला होता, त्यावेळी अभिजीत पाटील यांचे वंशज मदतीला उभे राहिले. त्यामुळे त्यांनी अभिजीत पाटील यांचे आभार मानले. यावेळी उपस्थितांसमोर बोलताना त्यांनी अभिजीत पाटील यांना थेट शिवसेनेत येण्याचं निमंत्रण दिलं. एवढंच नाही, तर आमच्याकडे येण्याचा निर्णय घेतला तर मंत्रीपदही देऊ शकतो, असं गोगावले म्हणाले. त्यामुळे या वक्तव्याला राजकीय महत्त्व प्राप्त झालं आहे. कारण अभिजीत पाटील हे सध्या शरद पवार यांच्या राष्ट्रवादी काँग्रेसचे आमदार आहेत. त्यांना थेट शिवसेना शिंदे गटाकडून मंत्रीपदाची ऑफर देण्यात आल्याने पक्षांतराच्या चर्चांना सुरुवात झाली आहे. विशेष म्हणजे, ही ऑफर एखाद्या बंद खोलीतील चर्चेतून नव्हे, तर सार्वजनिक कार्यक्रमात उपस्थितांसमोर देण्यात आली आहे.
मात्र, भरत गोगावले यांच्या या वक्तव्यावर अभिजीत पाटील यांची भूमिका अद्याप समोर आलेली नाही. त्यांनी शिवसेनेत प्रवेश करण्याबाबत कोणताही निर्णय जाहीर केलेला नाही. त्यामुळे ही केवळ गोगावले यांनी दिलेली राजकीय ऑफर आहे की त्यामागे काही राजकीय हालचाली सुरू आहेत, हे स्पष्ट झालेलं नाही. आता अभिजीत पाटील या ऑफरला कसा प्रतिसाद देतात आणि शरद पवार यांच्या पक्षाकडून यावर काही प्रतिक्रिया येते का, हे पाहणं महत्त्वाचं ठरणार आहे.

