कुणाचा वाढदिवस असो किंवा एखाद्या ग्रुपमध्ये ठरावीक वेळी महत्त्वाची माहिती पाठवायची असो, अनेकदा योग्य वेळी मेसेज पाठवायचा राहून जातो. पण आता WhatsApp यावर एक नवा पर्याय आणण्याच्या तयारीत आहे. कंपनीकडून ‘Schedule Message’ या फीचरची चाचणी सुरू आहे. या फीचरमुळे युजर्सना मेसेज आधीच लिहून ठेवता येईल आणि तो कोणत्या दिवशी व किती वाजता पाठवायचा, हेही ठरवता येईल. विशेष म्हणजे, हे फीचर केवळ टेक्स्ट मेसेजपुरतं मर्यादित नसून फोटो, व्हिडिओ आणि लिंकसाठीही उपलब्ध होऊ शकतं.
मिळालेल्या वृत्तानुसार, WhatsApp च्या Android बीटा व्हर्जन 2.26.40.7 मध्ये काही निवडक युजर्ससाठी या फीचरची चाचणी सुरू आहे. याचा वापर करण्यासाठी चॅटमध्ये मेसेज टाइप केल्यानंतर सेंड बटण काही वेळ दाबून ठेवावं लागेल. फीचर उपलब्ध असल्यास मेसेज पाठवण्याची तारीख आणि वेळ निवडण्याचा पर्याय दिसू शकतो. युजर्सना सध्याच्या वेळेपासून किमान १० मिनिटांनंतरचा आणि जास्तीत जास्त दोन आठवड्यांपर्यंतचा वेळ निवडता येणार असल्याचं वृत्त आहे. ठरलेली वेळ आल्यानंतर मेसेज आपोआप पाठवला जाईल. त्यामुळे महत्त्वाचा मेसेज पाठवण्यासाठी त्या वेळी फोन हातात असण्याची गरज भासणार नाही.
या फीचरचं आणखी एक वैशिष्ट्य म्हणजे युजर्सना केवळ टेक्स्ट मेसेजच नव्हे, तर फोटो, व्हिडिओ आणि लिंक पाठवण्याची वेळही आधीच निश्चित करता येऊ शकते. फोटो किंवा व्हिडिओ शेड्यूल करताना एका वेळी एकच मीडिया फाइल निवडता येणार असल्याची माहिती आहे. फोटो पाठवण्यापूर्वी त्यात बदल करण्याची किंवा कॅप्शन जोडण्याची सुविधाही मिळू शकते. त्यामुळे वाढदिवसाच्या शुभेच्छा, कार्यक्रमांची माहिती किंवा ठरावीक वेळी पाठवायचे फोटो यांसारख्या गोष्टींसाठी हे फीचर उपयोगी ठरू शकतं.
शेड्यूल केलेले मेसेज व्यवस्थापित करण्यासाठी चॅटच्या माहिती विभागात स्वतंत्र पर्याय मिळण्याची शक्यता आहे. या ठिकाणी युजर्सना भविष्यात पाठवण्यासाठी निश्चित केलेले मेसेज पाहता येतील आणि गरज पडल्यास ते पाठवण्यापूर्वी डिलीटही करता येतील. मेसेज पाठवण्यापूर्वीच तो हटवल्यास समोरच्या व्यक्तीला त्याबाबत कोणतीही नोटिफिकेशन जाणार नाही, असं वृत्तात म्हटलं आहे.
हे फीचर वैयक्तिक चॅटसोबतच ग्रुप चॅटमध्येही काम करू शकतं. मात्र, मेसेज शेड्यूल करताना ग्रुपमध्ये जे सदस्य असतील, त्यांनाच तो मेसेज मिळेल. त्यानंतर ग्रुपमध्ये सहभागी होणाऱ्या नव्या सदस्यांना आधी शेड्यूल केलेला मेसेज मिळणार नसल्याची माहिती आहे.
सध्या हे फीचर काही Android बीटा युजर्ससाठी चाचणीच्या टप्प्यात आहे. सर्व युजर्ससाठी ते कधी उपलब्ध होणार, याबाबत WhatsApp कडून अधिकृत तारीख जाहीर करण्यात आलेली नाही. त्यामुळे हे फीचर प्रत्यक्षात सर्वांसाठी कधी सुरू होणार, याकडे युजर्सचं लक्ष लागलं आहे.
