अलीकडे सोशल मीडियावर एक विचित्र पण तितकाच चर्चेचा विषय ठरलेला व्हिडिओ व्हायरल झाला—एक साधा कार्डबोर्ड बॉक्स, जो ‘हाय-फॅशन ड्रेस’ म्हणून रॅम्पवर सादर केला जातोय. या ड्रेसची किंमत तब्बल 8,900 डॉलर (सुमारे 8 लाख रुपये) असल्याचा दावा करण्यात आला. या व्हिडिओमुळे अनेकांनी Balenciaga या प्रसिद्ध ब्रँडचं नाव घेतलं आणि हा त्यांचाच नवा प्रयोग असल्याचं समजलं.
हा व्हिडिओ Celebsimulation नावाच्या इंस्टाग्राम अकाउंटवरून शेअर करण्यात आला होता. पोस्टमध्ये असा दावा करण्यात आला की, सध्या फॅशनमध्ये अनोखे आणि हटके प्रयोग ट्रेंडमध्ये आहेत, जिथे साध्या वस्तूंनाही ‘लक्झरी डिझाइन’चा टॅग दिला जातो. व्हिडिओ आणि फोटो इतके वास्तववादी होते की अनेकांनी ते खरे मानून मोठ्या प्रमाणावर शेअरही केले.
मात्र, या व्हायरल कंटेंटमागचं सत्य काही वेगळंच निघालं. हा संपूर्ण ‘कार्डबोर्ड ड्रेस’ प्रत्यक्षात अस्तित्वात नसून, तो आर्टिफिशियल इंटेलिजन्सच्या मदतीने तयार केलेला नकली कंटेंट होता. तरीही, लोक इतक्या सहजतेने या गोष्टीवर विश्वास का ठेवतात, हा प्रश्न निर्माण होतो.
यामागे एक महत्त्वाचं कारण म्हणजे Balenciaga चा पूर्वीचा इतिहास. या ब्रँडने याआधीही ‘Trash Pouch’सारखी कचर्याच्या पिशवीसारखी बॅग किंवा चिप्सच्या पॅकेटसारखी महागडी बॅग लाँच करून चर्चेत स्थान मिळवलं आहे. त्यामुळे या ब्रँडकडून काहीही अनोखं येऊ शकतं, अशी धारणा लोकांमध्ये आधीच तयार झाली आहे.
याशिवाय, या AI-जनरेटेड फोटोंमध्ये Megan Fox आणि Robert Pattinson यांसारखे सेलिब्रिटी हा ड्रेस घातलेले दाखवले गेले होते. त्यामुळे या कंटेंटची विश्वासार्हता आणखी वाढली.
प्रत्यक्षात, अशा प्रकारचे अकाउंट्स लोकांना आश्चर्यचकित करण्यासाठी आणि ‘खरं आणि खोटं’ यामधली सीमारेषा धूसर करण्यासाठीच तयार केले जातात. हा प्रकार पुन्हा एकदा दाखवतो की, सोशल मीडियावर दिसणारं प्रत्येक व्हायरल कंटेंट खरं असेलच असं नाही.
