ठाणे महानगरपालिकेच्या निवडणुकीनंतर चर्चेत आलेल्या एमआयएमच्या नगरसेविका सहर शेख हिचे वडील युनुस शेख यांनी एकनाथ शिंदे यांच्या शिवसेनेत प्रवेश केला आहे. युनुस शेख यांची कळवा-मुंब्रा केबल सेना अध्यक्षपदी नियुक्ती करण्यात आली आहे. या नियुक्तीचे पत्र देतानाचा फोटोही समोर आला आहे. विशेष म्हणजे, महापालिका निवडणुकीत सहर शेख हिच्या विजयानंतर तिच्या वक्तव्यांवरून राजकीय वातावरण चांगलेच तापले होते. त्यामुळे आता तिच्या वडिलांनी शिंदेंच्या शिवसेनेत प्रवेश करून महत्त्वाची जबाबदारी स्वीकारल्याने ठाण्यातील राजकीय वर्तुळात चर्चांना उधाण आले आहे.
ठाणे महानगरपालिकेच्या प्रभाग क्रमांक ३० मधून सहर शेख एमआयएमच्या तिकिटावर निवडून आली. निवडणुकीतील विजयाचा जल्लोष साजरा करताना तिने केलेल्या भाषणाचा व्हिडीओ सोशल मीडियावर मोठ्या प्रमाणात व्हायरल झाला होता. या भाषणात तिने ‘कैसा हरायाsssss…’ असे म्हणत विरोधकांना डिवचले होते. तसेच, येणाऱ्या काळात संपूर्ण मुंब्रा हिरव्या रंगाने व्यापून टाकायचा आहे, असे वक्तव्यही तिने केले होते. तिच्या या विधानावरून महायुतीतील नेत्यांसह एकनाथ शिंदे यांच्या शिवसेनेकडूनही टीका करण्यात आली होती. त्यामुळे सहर शेखचे हे वक्तव्य राजकीय चर्चेचा विषय बनले होते.
दरम्यान, युनुस शेख यांनी आता शिंदेंच्या शिवसेनेत प्रवेश केला असून, त्यांची कळवा-मुंब्रा केबल सेना अध्यक्षपदी नियुक्ती करण्यात आली आहे. समोर आलेल्या नियुक्तीपत्रात ही नियुक्ती एकनाथ शिंदे यांच्या आदेशाने करण्यात आल्याचा उल्लेख आहे. पक्षाच्या पदाधिकाऱ्यांकडून युनुस शेख यांना नियुक्तीपत्र देण्यात आल्याचे छायाचित्रही समोर आले आहे. सहर शेखच्या वक्तव्यावरून शिंदे सेनेकडून टीका झाली असताना तिच्या वडिलांना याच पक्षात महत्त्वाची जबाबदारी मिळाल्याने या घडामोडीकडे राजकीय दृष्टिकोनातून पाहिले जात आहे.
युनुस शेख आणि राष्ट्रवादी काँग्रेसचे नेते जितेंद्र आव्हाड यांच्यातील संबंधही यानिमित्ताने चर्चेत आले आहेत. युनुस शेख हे एकेकाळी जितेंद्र आव्हाड यांचे समर्थक होते. मात्र, कालांतराने दोघांमध्ये मतभेद निर्माण झाल्याचे सांगितले जाते. ठाणे महानगरपालिका निवडणुकीच्या वेळी युनुस शेख यांनी आपल्या मुलीसाठी शरद पवार यांच्या नेतृत्वाखालील राष्ट्रवादी काँग्रेसकडून उमेदवारी मागितली होती. मात्र, सहर शेखला उमेदवारी न मिळाल्याने तिने एमआयएमकडून निवडणूक लढवण्याचा निर्णय घेतला. या निवडणुकीत ती विजयीही झाली.
विजयानंतर झालेल्या सभेत युनुस शेख यांनी जितेंद्र आव्हाड यांच्यावर जोरदार टीका केली होती. आव्हाड यांनी आपल्या मुलीला उमेदवारी नाकारली, मात्र आपण तिला एमआयएममधून निवडून आणले, असे म्हणत त्यांनी आव्हाड यांना लक्ष्य केले होते. तसेच, प्रभाग क्रमांक ३० मध्ये आव्हाड दिसल्यास त्यांना दाखवून देऊ, अशा आक्रमक शब्दांत त्यांनी आव्हान दिले होते. या वक्तव्यामुळेही ठाण्यातील राजकीय वातावरण तापले होते.
आता युनुस शेख यांनी शिंदेंच्या शिवसेनेत प्रवेश केल्याने या राजकीय घडामोडींना नवे वळण मिळाले आहे. एका बाजूला सहर शेखच्या वक्तव्यावरून झालेला वाद, दुसरीकडे युनुस शेख आणि जितेंद्र आव्हाड यांच्यातील जुने मतभेद आणि आता शिंदे सेनेत मिळालेली जबाबदारी, यामुळे ठाण्यातील राजकारणात नव्या चर्चांना सुरुवात झाली आहे. या प्रवेशावरून महाविकास आघाडीचे नेते शिंदे सेनेला लक्ष्य करण्याची शक्यता व्यक्त केली जात आहे. मात्र, या पक्षप्रवेशाचा कळवा-मुंब्रा परिसरातील राजकीय समीकरणांवर नेमका काय परिणाम होतो, हे आगामी काळात स्पष्ट होईल.
