आज नाना पाटेकर म्हटलं की डोळ्यांसमोर येतो तो त्यांचा दमदार अभिनय, आवाज आणि भन्नाट संवाद. पण पडद्यावर येण्याआधी नाना एका वेगळ्याच मैदानावर आपलं नशीब आजमावत होते… क्रिकेटच्या मैदानावर. मुंबईच्या शिवाजी पार्कवर नाना क्रिकेट खेळायचे. हे तेच मैदान, जिथे पुढे भारतीय क्रिकेटमधलं मोठं नाव ठरलेले सुनील गावस्करही खेळायचे. गावस्कर हे नानांचे आदर्श होते आणि क्रिकेटची त्यांना प्रचंड आवड होती. एका जुन्या मुलाखतीत नानांनी क्रिकेटच्या दिवसांची आठवण सांगताना आणखी एक रंजक गोष्ट सांगितली होती. त्यांच्यापेक्षा वयाने लहान असलेले संदीप पाटीलही त्यांच्यासोबत खेळले होते. म्हणजे अभिनयाच्या दुनियेत येण्याआधी नानांचा बराच वेळ क्रिकेटच्या मैदानावरच जायचा. पण मग अचानक या खेळापासून दूर जाण्याची वेळ आली.
नानांच्या बोटाला दुखापत झाली आणि क्रिकेटच्या वाटेत अडथळा आला. त्यातच घरची परिस्थिती अशी होती की आई-वडिलांना आधार देण्यासाठी त्यांना काम करणं गरजेचं होतं. त्यामुळे क्रिकेटला पूर्णवेळ देणं शक्य झालं नाही. आणि इथूनच त्यांच्या आयुष्याची दिशा बदलली. क्रिकेट मागे सोडून नानांनी कला महाविद्यालयात प्रवेश घेतला. पुढे रंगभूमी आणि मग चित्रपट… आणि ज्या व्यक्तीने कधी शिवाजी पार्कवर क्रिकेट खेळलं होतं, त्याच व्यक्तीने पुढे अभिनयाच्या मैदानात स्वतःची वेगळी ओळख निर्माण केली. कदाचित त्या एका दुखापतीनं नानांना क्रिकेटपासून दूर केलं; पण त्याच वळणावरून ते अभिनयाच्या जगात आले. पुढे ‘क्रांतिवीर’, ‘परिंदा’, ‘नटसम्राट’सारख्या भूमिका त्यांच्या कारकिर्दीचा अविभाज्य भाग बनल्या. क्रिकेटमध्ये त्यांचं करिअर घडलं नाही… पण आयुष्याने त्यांना अभिनयाचं मैदान दिलं आणि तिथे नाना पाटेकरांनी आपला वेगळाच ठसा उमटवला.
