मुंबईची लोकल म्हणजे दररोज लाखो प्रवाशांच्या आयुष्याचा महत्त्वाचा भाग. लोकलचा प्रवास सोपा करण्यासाठी रेल्वेकडून डिजिटल सुविधांमध्ये सातत्याने बदल केले जात आहेत. आता RailOne ॲपमध्ये आणखी एक महत्त्वाची सुविधा सुरू करण्यात आली आहे. यामुळे एका व्यक्तीला स्वतःचा पास काढण्यासोबतच कुटुंबातील किंवा इतर प्रवाशांसाठीही लोकल पास बुक करता येणार आहे. ही सुविधा २ सप्टेंबरपासून उपलब्ध झाली आहे. नव्या नियमानुसार, एका प्रवाशाला स्वतःसह जास्तीत जास्त पाच अतिरिक्त प्रवाशांचे पास काढता येतील. त्यामुळे प्रत्येक कुटुंबीयाने स्वतंत्रपणे ॲपवर प्रक्रिया करण्याची गरज नसणार आहे.
पास दुसऱ्या व्यक्तीसोबत शेअर करता येईल
RailOne ॲपवरून एखाद्या दुसऱ्या प्रवाशासाठी पास काढल्यानंतर तो PDF स्वरूपात संबंधित व्यक्तीला पाठवता येणार आहे. मात्र, हा डिजिटल पास शेअर करताना काही गोष्टींची काळजी घ्यावी लागणार आहे. प्रवासाच्या वेळी पासवरील QR कोड आणि प्रवाशाचा फोटो स्पष्टपणे दिसणे आवश्यक आहे. तपासणीदरम्यान पासवरील फोटो आणि प्रत्यक्ष प्रवासी एकच व्यक्ती असल्याची खात्री केली जाईल. फोटोमध्ये तफावत आढळल्यास कारवाई होऊ शकते.
फक्त पावती दाखवून काम भागणार नाही
प्रवाशांनी आणखी एका महत्त्वाच्या नियमाकडे लक्ष देणे गरजेचे आहे. RailOne वर पास बुक केल्याची पावती, बुकिंगचे चलन किंवा जुन्या UTS कागदी पासची प्रत दाखवून प्रवास करता येणार नाही. प्रवास करताना संबंधित व्यक्तीकडे वैध डिजिटल पास असणे आवश्यक आहे. त्यामुळे पासचा PDF किंवा डिजिटल स्वरूपातील वैध पास प्रवासाच्या वेळी सहज उपलब्ध ठेवणे महत्त्वाचे ठरणार आहे.
स्वतःच्या पासची वैधता लगेच, दुसऱ्यासाठी काढलेल्या पासची पुढच्या दिवसापासून
नव्या सुविधेत पासच्या वैधतेसाठीही वेगवेगळे नियम आहेत. एखाद्या व्यक्तीने स्वतःसाठी पास काढला, तर त्याची वैधता बुकिंगच्या दिवसापासून सुरू होईल. पण दुसऱ्या प्रवाशासाठी पास काढल्यास त्याची वैधता बुकिंगनंतरच्या दिवसापासून सुरू होणार आहे. त्यामुळे पास काढताना प्रवाशांनी तारीख काळजीपूर्वक तपासणे आवश्यक आहे.
वयाचीही अट
स्वतःच्या नावाने पास काढण्यासाठी प्रवाशाचे वय १८ वर्षे किंवा त्यापेक्षा अधिक असणे आवश्यक आहे. तर दुसऱ्या व्यक्तीसाठी पास काढताना त्या प्रवाशाचे वय किमान ५ वर्षे असावे. डिजिटल पासची तपासणी अधिक वेगाने आणि अचूकपणे करता यावी, यासाठी तिकीट तपासणी कर्मचाऱ्यांना अद्ययावत उपकरणे वापरण्याच्या सूचना देण्यात आल्या आहेत. एकूणच, RailOne मधील या नव्या सुविधेमुळे कुटुंबासोबत लोकलने प्रवास करणाऱ्या प्रवाशांना मोठा दिलासा मिळणार आहे. एकाच ॲपमधून अनेक प्रवाशांचे पास काढण्याची सुविधा उपलब्ध झाल्याने पास बुकिंगची प्रक्रिया अधिक सोपी आणि वेळ वाचवणारी होण्याची शक्यता आहे.
