छत्रपती संभाजीनगरमधून एक अत्यंत दुर्दैवी घटना समोर आली आहे. तिसगाव परिसरातील खडव्या डोंगरावर एका 18 वर्षीय तरुणाला वाचवण्याच्या प्रयत्नात त्याच्या आई-वडिलांसह तिघांचा मृत्यू झाला. तरुण जीवन संपवण्याच्या उद्देशाने डोंगराच्या कड्यावर गेल्याची माहिती मिळाल्यानंतर कुटुंबीय, स्थानिक नागरिक आणि पोलिसांनी त्याला समजावण्याचा प्रयत्न केला. मात्र, बराच वेळ प्रयत्न करूनही तो ऐकण्याच्या मनस्थितीत नसल्याचं प्रत्यक्षदर्शींनी सांगितलं.
जवळपास तीन तास सुरू होते समजावण्याचे प्रयत्न
मिळालेल्या माहितीनुसार, तरुण सकाळी सुमारे 10 वाजता डोंगरावर पोहोचला होता. त्यानंतर स्थानिक नागरिक आणि पोलिसांनी त्याच्याशी संवाद साधण्याचा प्रयत्न केला. तो वारंवार जागा बदलत होता. आई त्याला फोनवरून आणि प्रत्यक्ष विनवणी करत होती. स्थानिक नागरिकांनीही त्याला आयुष्य संपवण्याचा निर्णय घेऊ नये, अशी समजूत घातली. मात्र, जवळपास तीन तासांच्या प्रयत्नांनंतरही तरुण आपला निर्णय बदलण्यास तयार नव्हता.
मुलाला पकडण्यासाठी वडील पुढे गेले
परिस्थिती गंभीर होत असल्याचं लक्षात आल्यानंतर तरुणाचे वडीलही त्याला समजावण्यासाठी पुढे गेले. मुलाला पकडून खाली आणण्याचा प्रयत्न करत असतानाच तरुणाने कड्यावरून खाली उडी घेतली. त्याला वाचवण्याच्या प्रयत्नात वडिलांचाही तोल गेला आणि ते दरीत कोसळले. दोघेही खाली पडल्याने त्यांचा मृत्यू झाला.
समोरच घडलेला प्रकार पाहून आईलाही धक्का
मुलगा आणि पती दोघेही दरीत कोसळल्याचं पाहून आईला मोठा धक्का बसला. त्यानंतर तिनेही डोंगरावरून खाली उडी घेतल्याची माहिती समोर आली आहे. या घटनेत एकाच कुटुंबातील तिन्ही व्यक्तींचा मृत्यू झाला.
मृतांची ओळख पटली
या दुर्घटनेत कुणाल मुरलीधर चांदवडे, मुरलीधर चांदवडे आणि संगीता चांदवडे यांचा मृत्यू झाल्याची माहिती आहे. हे कुटुंब देवळाई-सातारा परिसरात राहत असल्याचं सांगितलं जात आहे. तरुणाने इतकं टोकाचं पाऊल का उचललं, यामागचं नेमकं कारण अद्याप स्पष्ट झालेलं नाही.
प्रत्यक्षदर्शींनी सांगितली घटनाक्रमाची माहिती
या घटनेचे प्रत्यक्षदर्शी आणि तिसगावचे माजी सरपंच संजय जाधव यांनी सांगितलं की, तरुणाला बराच वेळ समजावण्याचा प्रयत्न करण्यात आला. त्याच्यापासून काही अंतरावर राहून स्थानिक नागरिक त्याच्याशी संवाद साधत होते. “आई-वडिलांची काळजी घे, तुझं भविष्य आहे,” असं सांगूनही तो ऐकण्याच्या मनस्थितीत नव्हता, अशी माहिती त्यांनी दिली. सकाळपासून सुरू असलेल्या या प्रयत्नांचा शेवट दुपारच्या सुमारास अत्यंत दुर्दैवी झाला.
घटनेचा व्हिडिओ सोशल मीडियावर व्हायरल
या संपूर्ण घटनेचा व्हिडिओ समोर आल्याची माहिती आहे. तो सोशल मीडियावर मोठ्या प्रमाणात शेअर होत आहे. मात्र, अशा संवेदनशील घटनेचा व्हिडिओ शेअर करताना मृत व्यक्तींच्या कुटुंबीयांच्या भावनांचा विचार करणं आणि आत्महत्येशी संबंधित दृश्यांचा प्रसार टाळणं महत्त्वाचं आहे. या घटनेनंतर परिसरात हळहळ व्यक्त होत असून, तरुणाने हे टोकाचं पाऊल का उचललं याचा तपास आता केला जात आहे.
