हिंगोली जिल्ह्यातील औंढा नागनाथ तालुक्यासह मराठवाड्यातील काही भागांना बुधवारी मध्यरात्री भूकंपाचे धक्के जाणवले. रात्री 1 वाजून 20 मिनिटांनी झालेल्या या भूकंपाची तीव्रता 3.6 रिश्टर स्केल इतकी नोंदवण्यात आली. राष्ट्रीय भूकंपशास्त्र केंद्राच्या (NCS) माहितीनुसार, भूकंपाचा केंद्रबिंदू औंढा नागनाथ तालुक्यातील फुलदाभा आणि जलालदाभा परिसरात, जमिनीखाली सुमारे 5 किलोमीटर खोलीवर होता.
भूकंपापूर्वी भूगर्भातून मोठा गडगडाटासारखा आवाज आल्याचे अनेक नागरिकांनी सांगितले. त्यानंतर काही सेकंद घरांना हादरे बसल्याने अनेकजण झोपेतून घाबरून जागे झाले. काही ठिकाणी घरांच्या खिडक्यांच्या काचा थरथरल्या, तर घरातील भांडीही हलल्याचे ग्रामस्थांनी सांगितले. परिस्थितीची जाणीव होताच अनेकांनी लहान मुलांसह घराबाहेर धाव घेत सुरक्षित ठिकाणी आश्रय घेतला.
या भूकंपाचे धक्के फुलदाभा, जलालदाभा, पिंपळदरी, राजदरी, सोनवाडी, निशाणा, असोंदा, काकडदाभा, पांगरा, मेथा, जडगाव, राजापूर आणि जांब या गावांसह वसमत तालुक्यातील पांगरा शिंदे, कुपटी, वापटी, कुरुंदा आणि गिरगाव परिसरातही जाणवले. सुदैवाने या घटनेत कोणतीही जीवितहानी किंवा मोठे आर्थिक नुकसान झाल्याचे वृत्त नाही.
दरम्यान, या भागात गेल्या काही दिवसांपासून वारंवार सौम्य भूकंपाचे धक्के आणि भूगर्भातून आवाज येत असल्याने नागरिकांमध्ये चिंतेचे वातावरण आहे. प्रशासनाकडून पाहणी आणि जनजागृती केली जात असली, तरी वारंवार होणाऱ्या या भूकंपांचे नेमके कारण काय, तसेच त्यामागील शास्त्रीय विश्लेषण आणि दीर्घकालीन उपाययोजना काय असतील, असा प्रश्न स्थानिक नागरिकांकडून उपस्थित केला जात आहे.
