साताऱ्यात झालेल्या 52 व्या हिंद केसरी कुस्ती स्पर्धेच्या अंतिम सामन्यानंतर आता मोठा वाद निर्माण झाला आहे. अंतिम फेरीत पराभूत झालेल्या महाराष्ट्र केसरी पृथ्वीराज मोहोळने विजेता महेंद्र गायकवाडवर नियमबाह्य डाव खेळल्याचा आरोप केला आहे.
अंतिम सामन्यात सोलापूरच्या महेंद्र गायकवाडने अवघ्या 20 सेकंदांत पृथ्वीराज मोहोळचा पराभव करत हिंद केसरी किताब जिंकला. पण सामना संपल्यानंतर पृथ्वीराजने सांगितले की, महेंद्रने त्याचा हात चुकीच्या पद्धतीने पकडून जोरात पिरगळला. त्यामुळे हाताला गंभीर दुखापत झाली आणि पुढे खेळणे शक्यच झाले नाही.
पृथ्वीराजच्या म्हणण्यानुसार, “महेंद्रने माझा हात दोन्ही हातांनी पकडून वळवला. त्यामुळे माझ्या हाताला खूप दुखापत झाली. त्याचा उद्देश मला जखमी करण्याचाच होता.” याबाबत आपण कुस्ती फेडरेशनकडे तक्रारही दिल्याचे त्याने सांगितले.
पृथ्वीराजने आणखी एक गंभीर दावा करत म्हटले की, महेंद्र गायकवाडवर याआधीही अशा प्रकारचे आरोप झाले आहेत. काही इतर पैलवानांनाही अशाच प्रकारे दुखापत झाल्याचे त्याने सांगितले.
दरम्यान, सामन्याचा व्हिडीओ सोशल मीडियावर व्हायरल होत असून त्यात महेंद्रने डाव टाकताना पृथ्वीराजचा उजवा हात पकडल्याचे दिसत आहे. त्यावेळी हात उलटा झाल्याने काही वेळ सामना थांबवण्यात आला होता. मात्र दुखापत गंभीर असल्याने पृथ्वीराजला सामना पुढे खेळता आला नाही. त्यानंतर पंचांनी महेंद्र गायकवाडला विजेता घोषित केले.
या संपूर्ण प्रकारामुळे आता हिंद केसरी स्पर्धेच्या निकालावर प्रश्न उपस्थित होत आहेत. कुस्ती फेडरेशन यावर काय निर्णय घेणार, याकडे आता सर्वांचे लक्ष लागले आहे.
